Banana Market : जळगावात केळी पट्ट्यात इराणच्या खरेदीदारांची पाहणी

Banana Market Update जळगाव : इराणमधील केळीचे खरेदीदार (Banana Buyers), आयातदार (Banana Importer) यांनी जळगाव जिल्ह्यातील रावेर, यावल, चोपडा आदी भागांत नुकतीच भेट दिली. त्यांनी केळीच्या शिवारात जाऊन केळीचा दर्जा, स्थिती आदींची माहिती घेतली, तसेच शेतकऱ्यांशी थेट संवाद साधला.

इराणमधील खरेदीदार मुजफ्फर लुफ्ती यांनी यावल तालुक्यातील हिंगोणा, वड्री भागात केळी बागांची पाहणी केली. लुफ्ती यांना इराणमध्ये १०० ते १५० कंटेनर (एक कंटेनर २० टन क्षमता) केळी रोज हवी असते.

यासंदर्भात त्यांनी जळगावात येऊन पाहणी केली. यात केळी पक्व होत आहे. तिचा दर्चा चांगला आहे. परंतु काढणी मार्चमध्ये वेग घेईल, असा अंदाज त्यांनी व्यक्त केला.

तसेच काही बागांना थंडीची बाधा (चिलिंग इंज्युरी) झाल्याचे दिसून आले. जमिनीतून दिले जाणारे पाणी किंवा फवारणीच्या मदतीने केळीतील चिलिंग इंज्युरीची समस्या थांबविता येईल का, यावर लुफ्ती व शेतकरी यांच्यात चर्चा झाली. लुफ्ती यांनी जळगावातील केळी खरेदीत रस दाखविला.

सुमारे पाच तास या भागात त्यांनी पाहणी केली. लुफ्ती यांच्यासोबत शेतकरी तथा अभ्यासक अमोल जावळे, नारायण चौधरी, गणेश नेहेते व इतर स्थानिक केळी उत्पादक उपस्थित होते.

खानदेशात निर्यातीच्या केळीला प्रति क्विंटल ३१२५ रुपये दर जागेवर मिळत आहे. रोज तीन कंटेनर केळीची आखातात निर्यात होत आहे.

मार्चमध्ये जिल्ह्यातून केळीची आयात करण्याचे लुफ्ती यांनी संकेत दिले. यामुळे केळीचे दर टिकून राहतील, असेही सांगण्यात आले.

इराणमधील केळी खरेदीदाराने जळगाव जिल्ह्यात पाहणी केली असून त्यांना मोठ्या प्रमाणात केळी हवी आहेत. यामुळे यंदा केळीची निर्यात वाढेल, अशी अपेक्षा आहे. परंतु ज्या भागात केळीत चिलिंग इंज्युरीची समस्या आहे, त्याबाबत त्रिची (तमिळनाडू) येथील राष्ट्रीय केळी संशोधन केंद्राने संशोधन करून समाधान करायला हवे. यामुळे निर्यातक्षमता वाढू शकेल.

- अमोल जावळे, केळी उत्पादक तथा अभ्यासक, जळगाव