मंगळवारपर्यंत ८० हजार टन ऊसगाळपाचे आव्हान

नांदेड : नांदेड प्रादेशिक सहसंचालक (साखर) कार्यालयाअंतर्गत नांदेड, परभणी, हिंगोली या तीन जिल्ह्यांतील गाळप हंगाम (Crushing Season) आटोपला आहे. त्यामुळे सर्व कारखाने बंद (Sugar Mill) झाले आहेत. परंतु लातूर जिल्ह्यात ८० हजार ६२५ टन ऊस शिल्लक (Excess Sugarcane) आहे. त्यामुळे येथील पाच कारखाने सात जूनपर्यंत सुरू राहणार आहेत. यामुळे या कारखान्यांसमोर दोन दिवसांत शिल्लक ऊसगाळप (Sugarcane Crushing) करण्याचे आव्हान आहे.

नांदेड विभागात नांदेडसह परभणी, हिंगोली व लातूर या चार जिल्ह्यांत ‘गाळप हंगाम २०२१-२२’ साठी २७ कारखान्यांनी गाळप सुरू केले होते. यात नऊ सहकारी, तर १८ खासगी साखर कारखान्यांचा समावेश होता. नांदेड, हिंगोली व परभणी जिल्ह्यांतील सर्वच १७ साखर कारखाने व लातूर जिल्ह्यातील पाच असे एकूण २२ कारखाने बंद झाले आहेत. परंतु लातूर जिल्ह्यात अद्याप पाच कारखाने सुरू आहेत. यात साईबाबा शुगर्स शिवणी, रेणा सहकारी साखर कारखाना सिंधगाव, विकास सहकारी साखर कारखाना तोंडार, विकासरत्न विलासराव देशमुख मांजरा सहकारी साखर कारखाना, चिंचोलीराव वाडी व ट्वेंटिवन शुगर लि. माळवटी या कारखान्यांचा समावेश आहे.

दरम्यान, विभागात तीन जूनपर्यंत एक कोटी ४६ लाख ५२ हजार ७३ टन उसाचे गाळप झाले. तर एक कोटी ५२ लाख ५६ हजार ६६० क्विंटल साखरेचे उत्पादन झाले. विभागाचा सरासरी साखर उतारा १०.४१ टक्के आहे.

कारखानिहाय ऊसगाळप, साखर उत्पादन

जिल्हा...कारखाने...ऊसगाळप (टनांत)...साखर उत्पादन (क्विंटल)

नांदेड...सहा...२५,३०,७०७...२४,७९,०३५

लातूर...१०...५९,२६,५७०...६२,९९,७१०

परभणी...सहा...४०,४६,७८७...४२,१३,७४५

हिंगोली...पाच...२१,४८,००८...२२,६४,१७०

एकूण...२७...१,४६,५२,०७३...१,५२,५६,६६०