फणस आणि हिरव्या मिरचीची धुब्री ते दुबई निर्यात

धुब्री, आसाम : आसाममधून दुबईला (Dubai) फणस आणि हिरवी मिरचीची निर्यात (Green chili Export) सुरू करण्यात आली असल्याचे अधिकाऱ्यांनी शनिवारी सांगितले. बिलासिपारा शहरात लोकप्रियो गोपिनाथ बोरडोलोई विमानतळावरून ही पहिली खेप उपजिल्हाधिकारी एम. पी. अन्बमुथन (Deputy Cm M. P. Anbmuthan) यांच्या हस्ते शुक्रवारी सायंकाळी मुंबईकडे रवाना करण्यात आली. तेथून पुढे ती दुबईला पाठविण्यात येणार आहे.

धुब्री जिल्ह्यातील अनेक उत्पादने निर्यातक्षम (Production Export) दर्जाची आहेत. ॲग्रिकल्चरल अँड प्रोसेस्ड फूड प्रॉडक्ट्स एक्स्पोर्ट डेव्हलपमेंट अथॉरिटी म्हणजेच एपीईडीएकडून (APEDA) गुवाहाटी येथे आयोजित करण्यात आलेल्या प्रदर्शनाच्या माध्यमातून फणस व मिरची उत्पादक शेतकरी संघटनेच्या सदस्यांनी प्रथम लुलू आंतरराष्ट्रीय समूहाच्या प्रतिनिधींची भेट घेतली आणि त्यानंतर फणस आणि हिरव्या मिरचीच्या निर्यातीची (Greens Chili Export) संधी उपलब्ध झाली, असे अन्बमुथन म्हणाले. एपीईडीए (APEDA) यांच्याकडून या सर्व प्रक्रियेचे नियोजन करण्यात येणार असून, त्यांच्याकडून त्यासाठी आवश्‍यक तांत्रिक साह्य करण्यात येणार आहे, असे त्यांनी सांगितले.

आठवडा तत्त्वावर निर्यात
दीड टन फणस आणि अर्धा टन हिवरी मिरची असलेली पहिली खेप निर्यात करण्यात आली आहे. लुलू आंतरराष्ट्रीय समूहाच्या वतीने गल्फ देशांमधील त्यांच्या २०० साखळी बाजारपेठांच्या माध्यमातून फणस आणि हिरवी मिरचीचे वितरण करण्यात येणार आहे. हिरवी मिरची उत्पादक संघटनेच्या सहकारी सोसायटीच्या बिलासपारा आणि नायर अल्गा विकास क्षेत्रातील ५६० भागधारक शेतकरी या उत्पादनांची आठवडा तत्त्वावर निर्यात करतात.