बाजरी, ज्वारी, गहू स्थिर, हरभरा हमी दराच्या आतच

औरंगाबाद: येथील कृषी उत्पन्न बाजार समितीमध्ये गत आठवड्यात १६ ते २१ मे दरम्यान आवक झालेल्या बाजरी, ज्वारी व गव्हाचे दर स्थिर राहिले. तुरीलाही सहा हजाराच्या आतच दर मिळाला. तर हरभऱ्याचे दर हमी दरापेक्षा कमीच राहील्याची स्थिती होती.

औरंगाबाद बाजार समितीमधील गत आठवडाभरात तुरीची केवळ दोन वेळा मिळून ३६ क्विंटल आवक झाली. अनुक्रमे आठ व २८ क्विंटल आवक झालेल्या तूरीला सरासरी ५ हजार ३७५ ते ५ हजार ७०० रुपये प्रति क्विंटल असा दर मिळाला. हरभऱ्याची आवक दोन वेळा मिळून आठ क्विंटल झाली. अनुक्रमे तीन व पाच क्विंटल आवक झालेल्या हरभऱ्याचे सरासरी दर ४१०० ते ४३०० रुपये प्रति क्विंटल दरम्यान राहिले. बाजरीचे आठवड्यात तीन वेळा मिळून ४२८ क्विंटल आवक झाली.

८६ ते २०२ क्विंटल दरम्यान आवक झालेल्या बाजरीला सरासरी १९०० ते १९७० रुपये प्रति क्विंटल असा दर मिळाला. ज्वारीची चार वेळा मिळून १७८ क्विंटल आवक झाली. या ज्वारीचे सरासरी दर २०२५ ते २०७५ रुपये प्रतिक्विंटल दरम्यान राहिले. सोयाबीनची चार वेळा मिळून १२६ क्विंटल आवक झाली. ७ ते ५३ क्विंटल दरम्यान कमी अधिक प्रमाणात आवक झालेल्या सोयाबीनला ५ हजार ७८० ते ६२०९ रुपये प्रति क्विंटल दरम्यान सरासरी दर मिळाला.

गव्हाची आवक ४९६ क्विंटल झाली. ६० ते १३१ क्विंटल दरम्यान कमी अधिक प्रमाणात आवक झालेल्या गव्हाला सरासरी २१०० ते २१५० रुपये प्रति क्विंटल दरम्यानचा दर मिळाल्याची माहिती बाजार समितीच्यावतीने देण्यात आली.