Onion Rate : कांदा ठरला आतबट्ट्याचा

पुणेः सप्टेंबर महिन्यापासून कांदा दराला (Onion Rate) काहीसा उठाव (Onion Demand) मिळत असतो. त्यामुळं शेतकरी कांदा चाळीत साठवून (Onion Storage) ठेवतात. मात्र यंदा कांदा उत्पादन (Onion Production) कमी होऊनही दरात अपेक्षेप्रमाणं वाढ झालेली नाही. उलट चाळीतील कांदा खराब (Onion Damage) होऊन शेतकऱ्यांचं नुकसानचं वाढलं. त्यामुळं किमान दोन हजार रुपये दर मिळायला हवा, असं शेतकऱ्यांनी सांगितलं.

त्याचं झालं असं की, यंदा उन्हाळी कांदा लागवडी आणि काढणीचं नियोजन चुकल्यानं बाजारावर दबाव आला होता. तो आजपर्यंत कायम आहे. उन्हाळ कांदा लागवडीच्या काळात कांदा दर सरासरी ७०० रुपये प्रतिक्विंटलवर होता. मात्र कांदा उत्पादन खर्चाचा विचार केल्यास क्विंटलमागं किमान ९०० ते १२०० रुपये खर्च येतो, असं शेतकऱ्यांनी सांगितलं.

कांदा काढणीच्या काळातही बाजार ७०० रुपयांवर होता. त्यामुळं दरवाढीच्या कारणानं शेतकऱ्यांनी कांदा चाळीत साठवून ठेवला. मात्र या कांद्याला आता ५ महिने झाले. त्यातच तापमान जास्त राहील्यानं कांदा सड होत आहे.

उन्हाळी कांदा लागवडी सरासरी नोव्हेंबर- डिसेंबरपर्यंत संपतात. मात्र गेल्याहंगामात पाऊस लांबल्यानं जवळपास ७५ टक्के लागवडी १५ डिसेंबर ते १५ जानेवारी या कालावधीत झाल्या. परिणामी कांदा काढणीही एकाच काळात होऊन बाजारात आवक वाढली.

त्यातच पाऊस आणि उष्णतेचा पिकाला फटका बसला. हवामान बदलामुळं कांदा वेळेआधीच पक्व होण्याचं प्रमाण वाढलं. पिकाचं नुकसान तर झालच शिवाय गुणवत्ताही खालावली. त्यातच तापमान जास्त असल्यानं कांदा लवकर सडत आहे.

बाजारावर दबाव का?

कांदा सड वाढल्यानं शेतकरी मिळेल त्या दरात कांदा विक्री करत आहेत. त्यामुळं बाजारात जास्त आवक दाटतेय. नाफेडनेही कांदा खरेदी करून साठा केला. तो कधीनाकधी बाजारात येणारच आहे. याचाही मानसिक दबाव बाजारावर आहेच. शिवाय केंद्रानं कांदा निर्यात बंद केलेली आहे. जास्त आवकेच्या काळात निर्यात सुरु राहील्यास बाजारावरील दबाव काहीसा कमी होतो. मात्र यंदा तसं झालं नाही. कांद्याला उत्पादनखर्चापेक्षा कमी दर मिळाल्यानं शेतकऱ्यांना मोठा फटका बसला.

सध्याचा दर काय?

मागील आठवड्यापासून दरात काहीशी सुधारणा झालेली दिसतेय. मात्र सध्या बाजारात कांद्याला सरासरी ८०० रुपये ते १४०० रुपये प्रतिक्विंटलचा दर मिळतोय. या दरातही शेतकरी तोट्यातच आहेत. कांद्याला २ हजार रुपयांपेक्षा जास्त दर मिळाला तरच शेतकऱ्यांना परवडेल, अशी स्थिती निर्माण झालीये.