Soybean Rate : लातूरला सोयाबीनची आवक आणि दरही चढेच

लातूर : येथील कृषी उत्पन्न बाजार समितीमध्ये सोयाबीनची आवक (Soybean Arrival) औरंगाबाद, जालना, बीड व उस्मानाबाद जिल्ह्यांतील उमरगा बाजार समितीत होणाऱ्या आवकेच्या तुलनेत गत आठवडाभरात जास्तच झाली. शिवाय दरही (Soybean Rate) इतर बाजार समित्यांच्या तुलनेत थोडे चढेच राहिल्याची स्थिती आहे.

लातूर कृषी उत्पन्न बाजार समितीत ५ ते ११ नोव्हेंबरदरम्यान सोयाबीनची एकूण आवक १ लाख ३ हजार ३६६ क्विंटल झाली. या सोयाबीनचे किमान दर ४९५२ ते ५६०१ रुपये प्रति क्विंटल दरम्यान, तर कमाल दर ५८११ ते ६३५१ रुपये प्रति क्विंटल दरम्यान राहिले. सोयाबीनला सरासरी दर ५५०० ते ५९८० रुपये प्रति क्विंटल दरम्यान मिळाला. सोयाबीनची आवक १३३१९ ते १९४५८ क्विंटल दरम्यान राहिली.

जालना बाजार समितीत सोयाबीनची आठवड्यात एकूण आवक ७९ हजार ४३८ क्विंटल झाली. ११८४२ ते १९४३३ क्विंटल दरम्यान कमी अधिक प्रमाणात आवक झालेल्या सोयाबीनचे किमान दर ३९०० ते ४५०० रुपये प्रति क्विंटल, कमाल दर ५७०० ते ६००० रुपये प्रति क्विंटल दरम्यान तर सरासरी दर ५१५० ते ५५०० प्रति क्विंटल दरम्यान राहिले.

बीड बाजार समितीत सोयाबीनची एकूण आवक ३ हजार ४९४ क्विंटल झाली. या सोयाबीनला किमान दर २५८३ ते ४६५१ रुपये प्रति क्विंटल दरम्यान, कमाल दर ५५५५ ते ५७०० प्रति क्विंटल दरम्यान मिळाला. दुसरीकडे बाजार समितीत सोयाबीनचे सरासरी दर ५२८४ ते ५४८८ रुपये प्रति क्विंटल दरम्यान राहिले.

औरंगाबाद बाजार समितीत सोयाबीनची चार वेळा मिळून ९१५ क्विंटल आवक झाली. या सोयाबीनचे किमान दर ४४०० ते ५००० रुपये प्रति क्विंटल दरम्यान, कमाल दर ५५४९ ते ५,६२१ रुपये प्रति क्विंटल दरम्यान व सरासरी दर ४९७५ ते ५२७४ रुपये प्रति क्विंटल दरम्यान राहिले.

उस्मानाबाद जिल्ह्यातील उमरगा बाजार समितीत सोयाबीनची आठवड्यातील एकूण आवक ४८० क्विंटल झाली. या सोयाबीनला किमान दर ४५०० ते ५१५० रुपये प्रति क्विंटल दरम्यान तर कमाल दर ५६३१ ते ६००० रुपये प्रति क्विंटल दरम्यान आणि सरासरी दर ५४०० ते ५८०० रुपये प्रतिक्विंटल दरम्यान राहिल्याची माहिती बाजार समितीच्या सूत्रांनी दिली.