Satara News : देशभरात प्रसिद्ध असलेली महाबळेश्वर तालुक्यातील स्ट्रॅाबेरी (Strawberry Rate) समाधानकारक दरामुळे शेतकऱ्यांसाठी दिलासादायक ठरली आहे. या हंगामात स्ट्रॉबेरीला सरासरी ६० ते ६५ रुपये प्रतिकिलो दर मिळाला आहे.
गतवर्षीच्या तुलनेत किलोमागे सरासरी पाच ते दहा रुपये दरात वाढ झाली आहे. मात्र वन्यप्राणी, गारपिटीसह अवकाळी पावसामुळे एकूण हंगामाच्या २० टक्के स्ट्रॅाबेरीचे नुकसानही झाले आहे.
स्ट्रॅाबेरी हे थंड हवेत येणारे फळ असल्याने महाबळेश्वर तालुक्यातील स्ट्रॅाबेरीला देशभरातून मागणी असते. या हंगामात मातृवृक्ष वेळेत असल्याने रोपे तयार होऊन वेळेत स्ट्रॅाबेरीची लागवड झाली. या हंगामात महाबळेश्वर तालुक्यात सुमारे तीन हजार एकर क्षेत्रावर लागवड झाली असल्याचा अंदाज आहे.
हंगामाच्या सुरवातीस स्ट्रॅाबेरी चांगला दर मिळतो. याही हंगामात २०० ते ३०० रुपयांपर्यंत दर मिळाला. त्यानंतर टप्पाटप्याने दरात घट होत जाते. एकूण हंगामाच्या सरासरी दराचा कल बघता ६० ते ६५ रुपये प्रतिकिलो सरासरी दर मिळाला आहे. गतवर्षी ५० ते ५५ रुपये सरासरी दर होता.
महाबळेश्वर तालुक्यातून एका हंगामात सरासरी ३० ते ३५ हजार मेट्रीक टन स्ट्रॅाबेरीचे उत्पादन मिळते. या हंगामात उत्पादनात घट झाली असली तरी दरात सुधारणा झाल्याने शेतकऱ्यांना दिलासा मिळाला आहे. ज्या शेतकऱ्यांकडे पाण्याची उपलब्धता आहे, असे शेतकरी एप्रिल, मेपर्यंत स्ट्रॅाबेरी पीक घेतात.
पर्यटकांना मिळणार नाही स्टॉबेरीचा स्वाद
महाबळेश्वर तालुक्यात जंगल मोठे असल्याने येथे वन्यप्राण्याकडून स्ट्रॅाबेरीला लक्ष केले जाते. स्ट्रॅाबेरी याही हंगामात वन्यप्राणी, अवेळी झालेला पाऊस तसेच नुकत्याच झालेल्या गारपिटीचा स्ट्रॅाबेरीस फटका बसला आहे.
एकूण हंगाम बघता २० टक्के उत्पादनात घट झाली आहे. मागील दोन दिवसांतील गारपिटीने स्ट्रॉबेरीला फटका बसला आहे. त्यामुळे एप्रिल, मे महिन्यात येणाऱ्या पर्यटकांना स्ट्रॅाबेरी मिळणार नसल्याचे शेतकऱ्यांनी सांगितले.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
