Tur Market : तूर दराची दहा हजारांकडे वाटचाल

Tur Market Update : बाजारात कापसाच्या दरात सातत्याने घसरण होत असताना दुसरीकडे तुरीच्या दरात सुधारणा अनुभवली जात आहे. सध्या तुरीच्या दराने साडेनऊ हजारांचा पल्ला गाठला असून येत्या काळात हे दर दहा हजार रुपयांवर पोहोचतील असा अंदाज आहे.

अमरावती बाजार समितीत तुरीची आवक आता मंदावली आहे. बाजार समितीमध्ये तुरीला पहिल्यांदा उच्चांकी ९७०१ रुपयांचा दर मिळाला आहे. तुरीच्या दरात झालेल्या वाढीच्या परिणामी तूर डाळही महागली आहे.

मॉलमध्ये १५० रुपये तर किराणा दुकानात १३५ रुपये किलो असा दर तूर डाळीला मिळत आहे. यंदाच्या पावसाळ्यात जिल्ह्यातील ८४ महसूल मंडलांत अतिवृष्टी झाली. जुलै ते ऑक्‍टोबर महिन्यापर्यंत झालेला सततचा पाऊस आणि सर्वच तालुक्‍यांत सरासरी पार झालेल्या पावसामुळे तुरीवर किडरोगांचा प्रादुर्भाव वाढीस लागला.

५० टक्‍के क्षेत्रातील तूर पिकावर मर रोगाचा प्रादुर्भाव झाला. त्या जागच्या जागी वाळल्या. त्यानंतर अतिथंडीचा परिणामही शिल्लक तुरीवर झाला. दवामुळे बहरातील तुरीचे शेंडे जळाले. त्यामुळे सरासरी उत्पादन घटले. परिणामी बाजारात तुरीची आवक घटल्याचे चित्र आहे.

परिणामी किराणा दुकानांसोबतच मॉलमध्ये तूर डाळीचे दर तेजीत आले आहेत. तूरडाळ महाग होत असल्याने साठेबाजीवर नियंत्रणाचे प्रयत्न प्रशासनाकडून सुरू आहेत. प्रत्येक स्तरावर लिमिट ठरवून देण्यात आली आहे.

व्यापाऱ्यांच्या माहितीनुसार, तूरडाळ १३५ ते १५० रुपये किलो दराने विकली जात आहे. त्यासोबतच मूग डाळ ११५ ते १२०, तर हरभरा डाळीला ७० ते ८० रुपये किलोचा दर मिळत आहे

मागील सात दिवसांतील तुरीचे दर (रुपयांत)

१२ मे ः ८२५०-८७६०

१३ मे ः ८३००-८८६७

१५ मे ः ८७५०-७२५०

१६ मे ः ८५००-९०३०

१७ मे ः ८५००-९२५३

१८ मे ः ८८५०-९२५३

१९ मे ः ९१००-९७०१