हमीभाव केंद्रावरील धानाची उचल करा

Lift paddy at the guarantee center
Lift paddy at the guarantee center

गडचिरोली ः हमीभाव केंद्रावर धान साठवणुकीचा प्रश्‍न निर्माण होत आहे. त्यामुळे धान केंद्रावरील धानाची उचल करण्यात यावी, अशी मागणी आदिवासी विविध कार्यकारी सोसायटीच्या शिष्टमंडळाने केली आहे. 

आदिवासी विकास महामंडळाचे प्रादेशिक व्यवस्थापक राजुरकर यांची भेट घेत त्यांना मागण्यांचे निवेदन देण्यात आले. शिष्टमंडळात कुरखेडा आदिवासी विविध कार्यकारी सोसायटीचे उपसभापती चांगदेव फाये, आंधळीचे उपसभापती विनोद खुणे, व्यवस्थापक हेमंत शेंदरे, संघटनेचे सचिव माधव तलमले, महेंद्र मेश्राम, सुधाकर वैरागडे, लिलाधर घोसेकर, नरेंद्र पटणे, व्यवस्थापक वसंता हटवार सुभाष बोरकर यांच्यासह इतर पदाधिकाऱ्यांचा समावेश होता. 

हमीभाव व त्याच्या जोडीला सानुग्रह अनुदान यामुळे शासकीय धान खरेदीचे दर २५०० रुपयांवर पोचले आहेत. त्यामुळे धान विक्रीसाठी शेतकऱ्यांनी हमीभाव केंद्रावर गर्दी केली आहे. संस्थांकडे असलेले गोदाम व काही ठिकाणी असलेले ओटे पूर्णतः भरलेले आहेत. धान साठवणुकीसाठी जागाच शिल्लक नाही. अजूनही अनेक शेतकऱ्यांकडील धान खरेदी करणे बाकी आहे. अशा शेतकऱ्यांचे धान नाइलाजाने उघड्यावरच ठेवावे लागले.

खरेदी केलेले धानही उघड्यावरच साठविण्यात आले आहे. अशातच अवकाळी पाऊस झाल्यास मोठ्या समस्येचा सामना करावा लागतो. हे धान झाकण्यासाठी ताडपत्रीची गरज राहते. त्याची मागणी करूनही पुरवठा करण्यात आला नाही. परिणामी पावसामुळे धान खराब होण्याची शक्‍यता नाकारता येत नाही. 

शासन निर्णयानुसार, दोन महिन्यांच्या आत धान उचल करण्याची जबाबदारी महामंडळाची आहे. मात्र, खरेदीनंतर तीन ते चार महिन्यांचा कालावधी होऊनही खरेदी केलेले धान मोठ्या प्रमाणावर केंद्रावर पडून आहे. भविष्यात पावसामुळे धान खराब होण्याची परिस्थिती निर्माण झाल्यास त्याला आविका संस्था जबाबदार राहणार नाही. त्यामुळे धान उचल करण्याची मागणी करण्यात आली.

Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.

ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
www.agrowon.com