परभणीत ३८.९१ लाखांच्या निधीची कामे प्रगतिपथावर

परभणी ः जिल्ह्यात चालू आर्थिक वर्षात एकात्मिक फलोत्पादन विकास अभियाना अंतर्गत ३१ लाभार्थी शेतकऱ्यांना २२ लाख २० हजार रुपये अनुदान वाटप करण्यात आले.
परभणीत ३८.९१ लाखांच्या निधीची कामे प्रगतिपथावर
38.91 lakhs in Parbhani Fund work in progress

परभणी ः जिल्ह्यात चालू आर्थिक वर्षात एकात्मिक फलोत्पादन विकास अभियाना अंतर्गत ३१ लाभार्थी शेतकऱ्यांना २२ लाख २० हजार रुपये अनुदान वाटप करण्यात आले. ६२ शेतकऱ्यांची ३८ लाख ९१ हजार ७८२ रुपयांच्या निधीची कामे सुरु आहेत. तर, ३३ शेतकऱ्यांची १ कोटी ४७ लाख ९२ हजार रुपये किमतीची कामे अजून प्रलंबित आहेत, अशी माहिती कृषी विभागाच्या सूत्रांनी दिली.

एकात्मिक फलोत्पादन विकास अभियाना अंतर्गत ट्रॅक्टर, मल्चिंग, शेततळे, शेडनेटगृह, पॉलिहाऊस आदी घटकांचा समावेश आहे. जिल्ह्यातील नऊ तालुक्यातील ७६७ शेतकऱ्यांच्या प्रस्तावित १० कोटी ७ लाख ३२ हजार ११३ रुपयाच्या कामांची निवड करण्यात आली होती. या अंतर्गत ट्रॅक्टर खरेदी केलेल्या ३१ शेतकऱ्यांना २२ लाख २० हजार ६७ रुपयांचे अनुदान वाटप करण्यात आले. त्यात परभणी, सोनपेठ, पालम, पूर्णा या तालुक्यातील प्रत्येकी २ शेतकऱ्यांना प्रत्येकी २ लाख रुपये अनुदान वाटप करण्यात आले.

जिंतूर तालुक्यातील ७ शेतकऱ्यांना ४ लाख ७१ हजार ४१० रुपये, सेलू तालुक्यातील १ शेतकऱ्यास १० हजार ९७७ रुपये, मानवत तालुक्यातील १३ शेतकऱ्यांना ९ लाख ८८ हजार ८८० रुपये, पाथरी तालुक्यातील १ शेतकऱ्यास १ लाख रुपये अनुदान वाटप करण्यात आले. एकूण ६२३  शेतकऱ्यांचे अर्ज रद्द झाले.

कांदा चाळींची ४२२ कामे सुरु 

‘राष्ट्रीय कृषी विकास योजने’अंतर्गंत २०१८-१९ मध्ये कांदा चाळींसाठी १ हजार ३११ शेतकऱ्यांची निवड झाली होती. त्यापैकी कामे पूर्ण केलेल्या सेलू आणि पाथरी तालुक्यातील २ शेतकऱ्यांना १ लाख ५५ हजार ८५८ रुपये अनुदान वाटप करण्यात आले. कांदा चाळींची ४२२ कामे सुरु आहेत. अजून ३५२ कामे प्रलंबित आहेत. तर, ५२५ शेतकऱ्यांचे अर्ज रद्द झाले आहेत.

शेततळ्यांच्या अस्तरीकरणासाठी ३६८ अर्ज आले आहेत. त्यापैकी ३५ कामे सुरु आहेत. ७ कामे प्रलंबित आहेत. तर ३१८ अर्ज रद्द झाले आहेत. २०१९-२० मध्ये संरक्षित शेतीसाठी ९५ अर्ज आले. त्यापैकी ३ कामे सुरु आहेत. २१ कामे प्रलंबित आहेत. ६९ अर्ज रद्द झाले. भाजीपाला रोपवाटिकेसाठी १३४ अर्ज आले. त्यापैकी १७ कामे सुरु आहेत. २८ कामे प्रलंबित आहेत. ८६ अर्ज रद्द झाले आहेत, असे सूत्रांनी सांगितले.

Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.

ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.