चिकू विमा हप्त्याचा फेरविचार नाहीच 

बोर्डी, जि. पालघरः चिकू फळपीक विमा योजनेत चालू वर्षी शेतकऱ्यांच्या हिश्शात सहा पटीने केलेल्या वाढीचा फेरविचार करण्यास कृषिमंत्र्यांनी स्पष्ट नकार दिला. तसेच शेतकऱ्यांनी विमा योजनेत भाग घ्यायचा किंवा नाही हे त्यांच्या इच्छेवर राहील. त्यांच्यावर कोणत्याही प्रकारची सक्ती करण्यात येणार नाही, अशी ग्वाही महाराष्ट्र राज्य चिकू उत्पादक संघाच्या शिष्टमंडळाला दिली. 

डहाणू विधानसभा मतदार संघाचे आमदार विनोद निकोले, राज्य उत्पादक संघाचे अध्यक्ष विनायक बारी, खजिनदार यज्ञेश सावे, अजय पाटील व अभिजित राऊत यांनी बुधवार (ता.२३) मुंबई येथे कृषिमंत्री दादा भुसे यांची भेट घेऊन पंतप्रधान हंगामी फळ पीक विमा योजनेअंतर्गत पालघर जिल्ह्यातील शेतकऱ्यांसाठी विमा हप्त्यात सहा पटीने केलेली वाढ कमी करावी, अथवा त्याचा फेरविचार करावा, या मागणीसाठी भेट घेतली. मात्र कृषी मंत्रालयाच्या अधिकाऱ्यांनी याबाबत विमा कंपनीची बाजू घेऊन शेतकऱ्यांच्या तोंडाला पाने पुसली. त्यामुळे मोठ्या आशेने गेलेल्या शिष्टमंडळाला रिकाम्या हाताने परतावे लागले. 

वीस वर्षांपासून चिकू बागायतदार वेगवेगळ्या समस्यांमध्ये अडकला आहे. उत्पादन घटले आहे. बाजारपेठांमध्ये मालाची विक्री योग्य दराने होत नाही, तसेच खताचे भाव वाढल्यामुळे बागायतदारांना आर्थिक तोटा सहन करावा लागत आहे.