देशातील सफरचंद उत्पादन वाढणार

नवी दिल्ली : यंदा वाढीस अनुकूल हवामान असल्यामुळे देशातील सफरचंद उत्पादन गेल्या वर्षापेक्षा जास्त राहील, असा अंदाज सूत्रांनी बुधवारी (ता. २९) वर्तविला आहे.

देशातील जम्मू-काश्मीर, हिमाचल प्रदेश, उत्तराखंड या प्रमुख उत्पादक राज्यांसह अरुणाचल प्रदेश, नागालँड, मेघालय, मणिपूर आणि सिक्किम येथेही सफरचंदाचे उत्पादन घेतले जाते. रेड डिलिशियस, रॉयल डिलिशीयस, रीच रेड या सफरचंदांच्या वाणांचे मुख्यत्वे उत्पादन घेतले जाते. देशांतर्गत मागणीनुसार सध्या उत्पादन होत आहे; मात्र सरकारने उत्पादनवाढीचे उद्दिष्ट ठेवले असून, त्यानुसार प्रयत्न केले जात आहेत. यंदा देशात २.३ दशलक्ष टन सफरचंद उत्पादन होण्याची शक्यता आहे. तरीही काही प्रमाणात आयातही शक्य असल्याचे सूत्रांचे म्हणणे आहे.

जवळचे देश असलेल्या नेपाळ आणि बांगलादेशमध्ये सफरचंदाची निर्यातवाढ होण्याची शक्यता आहे, तर अमेरिकेतून आयातवाढ होईल, असा अंदाज आहे.