धुळे, जळगाव, नंदुरबार जिल्ह्यांत पावसामुळे शेतकरीराजा सुखावला

धुळे, जळगाव, नंदुरबार जिल्ह्यांत पावसामुळे शेतकरीराजा सुखावला
धुळे, जळगाव, नंदुरबार जिल्ह्यांत पावसामुळे शेतकरीराजा सुखावला

जळगाव : खानदेशात धुळे जिल्ह्यासह जळगाव, नंदुरबामध्ये अनेक ठिकाणी रविवारी (ता. २३) मध्यरात्री व सोमवारी (ता. २४) जोरदार पाऊस झाला. काही ठिकाणी हलक्‍या स्वरूपाचा पाऊस झाल्याची माहिती आहे. शेतकरीराजा सुखावला असून, पेरणीच्या तयारीत आहे. परंतु सोयाबीन, कापूस, ज्वारी आदी पिकांची पेरणी किमान ५० मिलिमीटर पाऊस झाल्याशिवाय करू नये, असे आवाहन कृषी विभागाने केले आहे. 

पावसाच्या दमदार आगमनाची प्रतीक्षा शेतकऱ्यांना होती. काही शेतकऱ्यांनी धूळपेरणी केली होती; परंतु त्यावर जोरदार सरी बरसण्यासाठी शेतकरी आभाळाकडे डोळे लावून बसले होते. धुळे जिल्ह्यात शिरपूर, शिंदखेडा, धुळे भागांत अनेक महसूल मंडळांमध्ये सोमवारी सकाळी ११ वाजेपर्यंत २० मिलिमीटरपेक्षा अधिक पाऊस झाला. नंदुरबार जिल्ह्यातही तळोदा, शहादा भागात जोरदार पाऊस झाला. शहादा येथे १८ मिलिमीटर, तळोदा येथे २० मिलिमीटर पाऊस झाल्याची माहिती मिळाली.

जळगाव जिल्ह्यात चोपडा, यावल, रावेर, जळगाव, जामनेर, धरणगाव, मुक्ताईनगर, भुसावळ, पाचोरा, अमळनेर, पारोळा, चाळीसगाव, बोदवड भागांतही हलका ते मध्यम स्वरूपाचा पाऊस झाला. जळगावात १८, रावेरात १२, चोपडा येथे २० मिलिमीटर पावसाची सोमवारी सकाळपर्यंत नोंद झाल्याची माहिती मिळाली. नदी, नाले वाहत नसले तरी पूर्वहंगामी कापूस, वेलवर्गीय पिकांच्या सिंचनासंबंधीची कटकट अनेक ठिकाणी मिटली आहे. कापूस व इतर पिकांमधील तण नियंत्रण व खते देण्याचे काम शेतकऱ्यांनी सोमवारी हाती घेतले. 

पेरणीसाठी जोरदार पाऊस पडू द्या

कापूस, सोयाबीन, ज्वारी पेरणीची मुदत अजून आहे. यामुळे पेरणीची घाई शेतकऱ्यांनी करू नये. जोरदार पाऊस अनेक ठिकाणी झालेला नाही. सोयाबीन, ज्वारी, कापसाची पेरणी ५० मिलिमीटर पाऊस झाल्याशिवाय करू नये, असे कृषी विभागाने म्हटले आहे.

Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.

ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
www.agrowon.com