जांभुळणी ग्रामपंचायतीचे बंधाऱ्यांतून मत्स्यपालन

सामाजिक कार्यकर्ते संपतराव पवार यांच्या कल्पनेतून आणि ग्रामस्थांच्या सहकार्यातून बंधारे भाडेतत्त्वावर देऊन मत्स्यपालन व्यवसाय उभारला आहे. तो यशस्वीपणे सुरू आहे. यातून गावातील तरुणांना चांगले आर्थिक उत्पन्न मिळेल. - संगीता मासाळ, सरपंच, जांभुळणी
Fisheries through the small dams of the Jambhulani Gram Panchayat
Fisheries through the small dams of the Jambhulani Gram Panchayat

आटपाडी जि. सांगली : जांभुळणी (ता. आटपाडी) ग्रामपंचायतीने उत्पन्न वाढेल आणि गावातील तरुणांना गावातच रोजगार, व्यवसाय मिळेल, या हेतूने ओढ्यावरील सहा बंधाऱ्यांच्या पाणीसाठ्यात मत्स्यपालन व्यवसाय उभारला आहे. बंधारे गावातीलच तरुणांना भाडेतत्त्वावर दिले आहेत. यातून ग्रामपंचायतीच्या उत्पन्नात भर पडली आहे. तर, गावातील तरुणांना व्यवसाय मिळाला आहे. जिल्ह्यातील आगळ्यावेगळ्या यशस्वी मत्स्यपालनाची चांगली चर्चा रंगू लागली आहे. 

जांभुळणी ग्रामपंचायतीच्या सरपंच संगीता मासाळ यांनी सर्व सदस्यांना विश्वासात घेऊन मत्स्यपालनासाठी बंधारे भाडेतत्वावर देऊन गावातच व्यवसाय उभा करण्याचा यशस्वी प्रयोग साकारला आहे. यासाठी त्यांनी ग्रामसभेत चर्चा केली. बंधारे तरुणांना भाडेतत्त्वावर देण्याचा ठराव घेतला. गावातील ओढ्यावर एकूण १२ बंधारे आहेत. पहिल्या टप्प्यात अंदाज घेण्यासाठी त्यांनी पाच सिमेंट बंधारे आणि एक केटीवेअर बंधारा भाडेतत्त्वावर दिला. हे बंधारे मुंबईत हमाली आणि रोजगार करणाऱ्या तरुणांना दिले. त्यांना मत्स्यपालनाचे तज्ञांकडून प्रशिक्षण दिले. अडीच महिन्यापूर्वी प्रत्येक बंधाऱ्यात एक लाख मत्स्यबीज सोडले. 

सर्व बंधारे पाण्याने भरले आहेत. टेंभूच्या मुख्य कालव्यातून थेट बंधाऱ्यात पाणी येऊ शकते. त्यामुळे पाण्याची फारशी अडचण नाही. वाहत्या पाण्याच्या काळात मासे उलट्या प्रवाहाने वर जातात म्हणून अत्यंत मजबूत आणि लहान लोखंडी जाळ्या प्रत्येक बंधाऱ्याच्या वर आणि खाली लावल्या आहेत. त्यामुळे मासे बाहेर जाऊ शकत नाहीत. सध्या हे मासे २५० ग्रॅम वजनाचे झाले आहेत. साधारण सात महिन्यांच्या दरम्यान ते विक्रीयोग्य होतात. एक मासा ५०० ते ७०० किलोग्रॅम होईल, असा अंदाज आहे. विक्रीसाठी अजून तीन महिने वेळ आहे.

एका बंधाऱ्यातून १३ टन उत्पादनाची अपेक्षा

प्रत्येक बंधाऱ्यात एक लाख बीज सोडले आहे. यातील २५ टक्के जिवंत राहिल्यास आणि अर्धा किलो वजनाचे झाल्यास एका बंधाऱ्यातून १२ ते १३ टन उत्पादन अपेक्षित आहे. ८० रुपये प्रतिकिलो दराने मासा विकला, तर दहा लाख रुपये उभा राहू शकतात. खर्च  वजा जाता सात लाख रुपये उत्पन्न राहू शकते, असा अंदाज काढला आहे. 

Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.

ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
www.agrowon.com