खानदेशात थंडी वाढली; रब्बीला लाभ अपेक्षित

खानदेशात किमान तापमान ९ अंश सेल्सीअसखाली आले आहे. यामुळे रब्बी हंगामातील पिकांना लाभ होईल, अशी अपेक्षा आहे.
Khandesh grew cold; Rabbi expected to benefit
Khandesh grew cold; Rabbi expected to benefit

जळगाव ः खानदेशात किमान तापमान ९ अंश सेल्सीअसखाली आले आहे. यामुळे रब्बी हंगामातील पिकांना लाभ होईल, अशी अपेक्षा आहे.

गेले दोन-तीन दिवस थंडी कमी अधिक झाली. परंतु सोमवारी (ता. २८) रात्री वातावरणात चांगलाच गारठा तयार झाला. सायंकाळपासून गार वारे सुटले. यानंतर मध्यरात्री किमान तापमान ९ अंश सेल्सीअस खाली पोचले. या मोसमात प्रथमच किमान तापमान ९ अंश सेल्सीअसपेक्षा कमी असल्याची नोंद जळगाव येथील कृषी संशोधन केंद्राचे हवामान केंद्र, धुळे येथील कृषी विज्ञान केंद्रात झाली.

यंदा थंडी सुरवातीपासून कमी अधिक आहे. हुडहुडी भरविणारी थंडी यंदा नसल्याने कोरडवाहू रब्बी पिकांचे नुकसान होईल, अशी स्थिती तयार झाली. अनेकदा ढगाळ वातावरण तयार झाले. मध्यंतरी १२ दिवस ढगाळ वातावरण होते. यामुळे कोरडवाहू रब्बी पिकांमध्ये हरभरा पिकात फवारण्या घ्याव्या लागल्या.

प्रतिकूल स्थितीत दादर ज्वारीवरही चिकटा रोगाची समस्या दिसत होती. एेन वाढीच्या वेळेस थंडीची प्रतीक्षा होती. परंतु गेल्या आठवड्याच्या मध्यापासून थंडी पडत आहे. पण थंडी कमी अधिक, अशी होती. किमान तापमान १२ ते १४ अंश सेल्सीअस यादरम्यान होते. सोमवारी मध्यरात्री मात्र चांगलाच गारठा पसरला. यामुळे रब्बी पिके जोमात येतील, अशी अपेक्षा शेतकऱ्यांना आहे.

थंडी वाढेल किंवा कायम राहील, हे लक्षात घेता अनेक केळी उत्पादकांनी पिकाला रात्रीच्या वेळेस पाणी देण्याचे नियोजन केले आहे. तसेच हरभरा पिकाचे सिंचन करून घेण्याचीदेखील लगबग सुरू आहे. दादर ज्वारी पिकात दाणे पक्व होत आहेत. या पिकालाही थंडीचा लाभ होईल, असे दिसत आहे.

थंडी यंदा कमी आहे. परंतु आता थंडी पडत असल्याने रब्बी पिकांना बऱ्यापैकी लाभ होईल, असे दिसत आहे. थंडी असल्यास मका, ज्वारी पिकात सिंचनाची गरजही कमी असणार आहे. - रमेश पाटील, शेतकरी, चोपडा, जि. जळगाव

Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.

ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
www.agrowon.com