नैर्ऋत्य मोसमी वाऱ्यांनी पाच दिवसांत व्यापले राज्य...

पुणे : नैर्ऋत्य मोसमी वाऱ्यांनी (मॉन्सून) मंगळवारी (ता. २५) मंबईसह राज्याचा सर्व भागांत दाखल होत संपूर्ण महाराष्ट्र व्यापला. यंदा महाराष्ट्रातील आगमन उशिराने होत १९७२ नंतर उशिरा २० जून रोजी मॉन्सून तळकोकणात पोचला. त्यानंतर वेगाने वाटचाल करत पाच दिवसांत राज्य व्यापले. मॉन्सूनने आपले टप्पे पार केल्यानंतर वाऱ्यांची दिशानिश्चित होऊन सप्टेंबरपर्यंत पावसाचे यामार्गाखाली प्रदेशात नैसर्गिक वितरण होते.

साधारणतः १५ जून रोजी राज्य व्यापणाऱ्या मॉन्सूनला यंदा १० दिवस उशीर झाला. राज्यात दाखल होताच मॉन्सूनने वेगाने वाटचाल केली. गुरुवारी (ता. २०) कोकणात, दक्षिण मध्य महाराष्ट्रात पोचणाऱ्या मॉन्सूनचा उत्तरेकडे मजल दरमजल प्रवास सुरूच आहे. रविवारी (ता. २३) मॉन्सूनने मध्य महाराष्ट्र, विदर्भाचा काही भाग, मराठवाड्याचा बहुतांशी भाग व्यापला. सोमवारी (ता. २४) मॉन्सूनने मराठवाडा, विदर्भ व्यापला, तर कोकण वाटचाल रेंगाळलेल्या मॉन्सूनने चार दिवसांनंतर वाटचाल करत अलिबागपर्यंत धाव घेतली. तसेच मध्य महाराष्ट्रातील पुणे, नगर, मालेगावपर्यंत मॉन्सूनने मजल गाठली होती. मॉन्सूनने मंगळवारी दक्षिण गुजरात, मध्य प्रदेशच्या आणखी काही भागांपर्यंतचा टप्पा पूर्ण केला आहे. यंदा सुरवातीपासूनच मॉन्सूनची वाटचाल खूपच अडखळत सुरू आहे. १८ मे रोजी अंदमानात पोचलेल्या मॉन्सूनने तब्बल आठवडाभरानंतर २५ मे रोजी थोडीशी चाल केली. ३० मे रोजी मॉन्सूनने संपर्ण अंदमान व्यापून, अरबी समुद्राकडे वाटचाल केली. ५ जून रोजी श्रीलंका देशाचा जवळपास निम्मा भाग व्यापला. तर तब्बल आठवडाभर उशिराने ८ जून देवभूमी केरळात डेरेदाखल झाला. त्यानंतर १० जून मॉन्सूनने केरळच्या बहुतांशी भागांत मजल मारली. याच दरम्यान अरबी समुद्रात तयार झालेल्या अतितीव्र ‘वायू’ चक्रीवादळाने मॉन्सूनची वाटचाल रोखून धरली. १४ जून रोजी दक्षिण कर्नाटकातील मंगळूरू, मैसूरपर्यंतचा पट्टा मॉन्सूनने पूर्ण केला होता.