साताऱ्यातील १७ कृषी सेवा केंद्रांना विक्री बंदचे आदेश

सातारा : कृषी सेवा केंद्र तपासणी मोहीम सुरू करण्यात आली आहे. यात तीन कृषी निविष्ठा विक्री केंद्रांचा परवाना निलंबित केला. तर चार बियाणे दुकाने, १० खत दुकाने व ३ कीटकनाशकांच्या दुकानांना विक्री बंद करण्याचे आदेश देण्यात आले आहेत. तसेच सात कृषी निविष्ठा विक्री केंद्रांना दस्तऐवज अद्ययावत न ठेवल्याबाबत सक्त ताकीद देण्यात आली आहे, अशी माहिती कृषी विभागाने प्रसिद्धी पत्रकाद्वारे दिली.

कृषी सेवा केंद्र तपासणी मोहिमेंतर्गत जिल्ह्यात कृषी निविष्ठा विक्री केंद्राची कृषी विभागामार्फत २२६ व जिल्हा परिषद कृषी विभागांतर्गत ५२० अशा एकूण ६४६ विक्री केंद्रांची तपासणी करण्यात आली. यात तीन कृषी निविष्ठा विक्री केंद्रांचा परवाना निलंबित केला, तर चार बियाणे दुकाने, १० खत दुकाने व ३ कीटकनाशकांच्या दुकानांना विक्री बंद करण्याचा आदेश देण्यात आलेला आहे. तसेच सात कृषी निविष्ठा विक्री केंद्रांना दस्तऐवज अद्ययावत न ठेवल्याबाबत सक्त ताकीद देण्यात आली आहे.

तसेच कोल्हापूर विभागीय भरारी पथकाकडून म्हासुर्णे (ता. खटाव) येथील मे. माळवे फर्टिलायझर या दुकानावर छापा टाकून विना परवाना विक्रीसाठी ठेवलेल्या पीडीएम पोटॅश खताच्या ३६० गोण्या जप्त करून वडूज पोलिसांत गुन्हा दाखल केला.

कृष्णा फर्टिलायझर, पानवन (ता. माण) या खत कारखान्यावर जिल्हा गुणनियंत्रण निरीक्षक सातारा यांनी छापा मारून विना परवाना तयार होत असलेला बोगस खताचा साठा यामध्ये फॉस्फेट रिच ऑरगॅनिक मॅनियूरच्या ५० बॅगा, नॅचरल पोटॅशच्या २३५ बॅगा, ca:mg:s (१०:५:१०)च्या २९५ बॅगा असा एकूण सुमारे ४ लाख ९८ हजार किमतीचा मुद्देमाल जप्त करण्यात आला आहे.