सोलापुरात पाऊस; पण जोर कमी

सोलापुरात पाऊस; पण जोर कमी
सोलापुरात पाऊस; पण जोर कमी

सोलापूर : जिल्ह्यात रविवारी (ता. २३) रात्री झालेल्या किरकोळ पावसानंतर सोमवारी (ता. २४) सलग दुसऱ्या दिवशी सकाळीच मॉन्सूनने काही ठरावीक भागांत हजेरी लावली. प्रामुख्याने पंढरपूर, मोहोळ, माळशिरस तालुक्‍यांमध्ये पावसाला सुरवात झाली. पावसाने हजेरी लावली असली तरी त्यामध्ये फारसा जोर नव्हता. शिवाय तो सरसकट झाला नाही.  

सकाळी आठ वाजता संपलेल्या २४ तासांत जिल्ह्यातील ९१ मंडळांमध्ये सरासरी ८.४६ मिलिमीटर इतक्या पावसाची नोंद जिल्हा प्रशासनाकडे झाली आहे. गेल्या पंधरवड्यापासून पावसाची जिल्ह्याला प्रतीक्षा आहे. पण पाऊस काही येत नाही. दोन दिवसांपूर्वीही काही ठरावीक भागांत हलकी हजेरी लावून पाऊस परतला; पण पुन्हा रविवारी वातावरण चांगले तयार झाले. सोमवारी मात्र पहाटेपासून प्रत्यक्षात त्याने सुरवात केली, पण त्यात फारसा जोर नव्हता. पंढरपूर, मोहोळ, माळशिरस या भागांत मात्र त्याने बऱ्यापैकी हजेरी लावली. पण अन्य भागाला मात्र नुसत्याच वाकुल्या दाखवल्या. 

पंढरपूर शहर आणि आसपासच्या गावातून सोमवारी पहाटे ५ नंतर रिमझिम पावसाला सुरवात झाली होती. ५ वाजल्यानंतर पावसाचा जोर काही प्रमाणात वाढल्याचे दिसून आले. सकाळी ७ वाजेपर्यंत पावसाची रिपरिप सुरूच होती. त्यामुळे ग्रामीण भागातील शेतामध्ये पाणी साठले होते. उपरी, वाखरी, भाळवणी, तुंगत, मगरवाडी, इसबावी या भागांत पाऊस झाला. मोहोळ आणि माळशिरस, मंगळवेढ्याच्या काही भागांतही पावसाने हजेरी लावली. 

अन्य भागांत उत्तर सोलापूर, दक्षिण सोलापूर, बार्शी या भागांत मात्र पहाटे केवळ रिपरिप होऊन तो थांबला. त्यात फारसा जोर नव्हता. सोमवारी दिवसभर कधी ढगाळ आणि कधी ऊन असे वातावरण राहिले. दुष्काळामुळे आधीच शेतकरी चिंतेत आहेत, पण पाऊस सातत्याने लांबत असल्याने त्यांच्या चिंतेत आणखीनच भर पडली होती. पण पावसाने उशिरा का होईना सुरवात केल्याने काहीसे समाधान व्यक्त होत आहे.

Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.

ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
www.agrowon.com