सांगलीसह पश्‍चिमेकडे पाऊस 

सांगली : दोन दिवसांपासून पावसाने पश्‍चिम भागात चांगली हजेरी लावली आहे. रविवारी (ता. २३) जिल्ह्यातील बहुतांश ठिकाणी, तर शिराळा, वाळवा आणि कडेगाव तालुक्‍यात मंगळवारी (ता. २५) जोरदार पाऊस पडला. धरण पाणलोट क्षेत्रात जोरदार पाऊस झाला.

सांगली शहरात मंगळवारी पावसाने उघडीप दिली. नागज-रायेवाडी (ता. कवठेमहांकाळ) येथे दुपारी एकच्या सुमारास सुमारे दीड तास पावसाने झोडपले. या पावसामुळे नागज येथील बंधारा तुडुंब भरला. जिल्ह्यात शनिवारपासून (ता. २२) दमदार पावसाला सुरवात झाली. रविवारी सर्वत्र चांगला पाऊस झाला होता. त्यामुळे पावसाचा जोर कायम राहण्याच्या आशा निर्माण झाल्या आहेत. जिल्ह्यातील विविध भागांत सोमवारी (ता. २४) सायंकाळी जोरदार पावसाने हजेरी लावली. शिराळा, कडेगाव, पलूस आणि वाळवा तालुक्‍यांतील अनेक गावांमध्ये चांगला पाऊस झाला. त्यामुळे शेतकऱ्यांतून समाधान व्यक्त करण्यात येत आहे.  

मंगळवारी दुपारनंतर ढगाळ वातावरण निर्माण झाले होते. कवठेमहांकाळ तालुक्यातील नागज व रायेवाडी येथे पाऊस संततधार सुरू होता. त्यामुळे नागज येथील बंधारा तुडुंब भरला आहे. ओढ्यातही मोठ्या प्रमाणात पाणी आले आहे. रायेवाडी तलावात पाणी आले आहे. तेथील गाळ व मुरूम काढण्यात येत आहे.

गाळ पोकलॅंडच्या साह्याने उचलण्याचे काम सुरू होते. मात्र अचानक जोरदार आलेल्या पावसाने तलावात पाणी आले. पोकलॅंड पाण्यात बुडाले. ढालगाव व परिसरातील काही भागांतही पाऊस पडल्याने शेतकऱ्यांत समाधान आहे.