संकरित वाणाची होणार सधन पद्धतीने लागवड

 नागपूर : सरळ वाणाचा उपयोग करून कापसाची सधन लागवड करून उत्पादकता वाढीचे प्रयत्न आजवर झाले. या पुढील काळात संकरीत वाणांच्या माध्यमातून देखील सधन लागवडीला प्रोत्साहन देण्यात येणार आहे. राज्यात १५ लाख हेक्‍टरपेक्षा अधिक हलक्‍या प्रतीच्या जमिनीवर कापसाची लागवड होते, अशा भागात हे प्रयोग राबविण्याचे प्रस्तावीत असून, त्याद्वारे उत्पादकता वाढीचा उद्देश साधता येईल, असा विश्‍वास केंद्रीय कापूस संशोधन संस्थेचे संचालक डॉ. वाय. जी. प्रसाद यांनी गुरुवारी (ता. ७) व्यक्‍त केला.  केंद्रीय कापूस तंत्रज्ञान संस्था (सिरकॉट) सभागृहात कॉन्फडीरेशन ऑफ इंडियन टेक्‍सटाईल इंडस्ट्रीज, कॉटन डेव्हल्पमेंट ऍण्ड रिसर्च असोसिएशन मुंबई तसेच सिरकॉट यांच्या संयुक्‍त सहकार्याने जागतिक कापूस दिवसानिमित्त आयोजित कार्यक्रमात ते बोलत होते. डॉ. प्रसाद म्हणाले, ‘‘बोंडअळीची समस्या गेल्या काही वर्षांत गंभीर होत चालली आहे. या समस्येचे प्रभावी निराकरण होण्यासाठी लवकरच सीआयसीआरद्वारे तंत्रज्ञानाची शिफारस केली जाणार आहे. त्या संदर्भातील संशोधन अंतिम टप्प्यात आहे. तंत्रज्ञान प्रसारावर देखील येत्या काळात भर दिला जाणार असून, त्याकरीता मोबाइलचा प्रभावी वापर करण्याची योजना आहे. सुरुवातीला कार्यक्रमाचे प्रास्ताविक कॉन्फडीरेशन ऑफ इंडियन टेक्‍सटाईल इंडस्ट्रीजचे समन्वयक गोविंद वैराळे यांनी केले. रुईच्या प्रमाणात कापसाला दर मिळावा यासाठी संस्था गेल्या काही वर्षांपासून पाठपुरावा आणि जागृती करीत आहे. या मोहिमेला काही अंशी यश आल्याची माहिती त्यांनी दिली. कॉन्फडीरेशन ऑफ इंडियन टेक्‍सटाईल इंडस्ट्रीज या संस्थेचे हे सुवर्ण महोत्सवी वर्ष असल्याचा गौरवपूर्ण उल्लेख त्यांनी केला.  सेंद्रीय कापूस करेल मालामाल  जीमाटेक्‍स इंडस्ट्रीजचे संचालक प्रशांत मोहता म्हणाले, ‘‘या वर्षी कापसाचे दर सहा हजार रुपयांपेक्षा अधिक राहतील. सद्यःस्थितीत चीन सहित अनेक देशांची सेंद्रिय कापसाला मागणी आहे. सेंद्रीय कापूस गाठीचा दर ३०० रुपये किलो राहील.