अकोट तालुक्यात तुरीवर मर रोगाचा प्रादुर्भाव

अकोट, जि. अकोला ः तुरीचे पीक सध्या बहरात असताना आधी ढगाळ वातावरण आणि आता मर रोगामुळे उभे पीक वाळत आहे. त्यामुळे याचा परिणाम उत्पादनावर होण्याची शक्यता वाढली आहे. यंदाच्या हंगामात संकटांचा सामना करणाऱ्या शेतकऱ्यांवर हे नवे संकट उभे राहिले आहे. 

बुरशीजन्य रोगामुळे तुरीची झाडे वाळत आहेत. आधी पाने पिवळसर पडतात. मुळांच्या आतमध्ये मध्यभागी हलक्या तपकिरी रंगाची रेषा दिसून येते. कधी कधी खोडावर पांढरी बुरशीसुद्धा आढळते. या रोगात झाडाचे शेंडे कोमेजतात. झाड बऱ्याच वेळा हिरव्या स्थितीत वाळते. रोगामुळे शेतकऱ्यांची बरीचशी झाडे वाळत असल्याने तुरीच्या उत्पादनात घट येण्याची शक्यता वाढली आहे.

सततच्या नापिकीमुळे त्रस्त असलेल्या शेतकऱ्यांवर हे नवे संकट उभे ठाकले आहे. आधी ढगाळ वातावरणामुळे फुलांवर आलेल्या तुरीच्या पिकात मोठ्या प्रमाणात फूल गळती झाली होती. त्यांनतर मर रोगाचा प्रादुर्भाव वाढत आहे. यामुळे अपेक्षित उत्पादन मिळणे कठीण झाले आहे. मर रोगाने तुरीच्या पिकावर आक्रमण केल्याने शेतकरी हे पीक वाचविण्यासाठी जिवाची पराकाष्ठा करीत आहेत. महागडी कीटकनाशके फवारणी करून आपले पीक कसे वाचणार, यासाठी धडपडत आहेत.

गत आठवड्यात धुके पडल्याने तुरीच्या पिकावर आलेल्या अळीमुळे शेतकऱ्यांचे मोठ्या प्रमाणात नुकसान झाले आहे. यंदा सुरुवातीला पाऊस चांगला झाल्याने तूर पिकाचे चांगले उत्पादन होणार, अशी अपेक्षा शेतकऱ्यांना होती. पण शेंगा भरण्याच्या स्थितीत परिसरात धुके पडल्याने तुरीचा फुलोर जळाला. आता उत्पादनात घटीची शक्यता वाढली आहे. - प्रवीण साबळे, शेतकरी, तरोडा