यंदाही बैलपोळा सण साजरा होणार की नाही?

अकोला ः गेल्यावर्षात कोरोना निर्बंधामुळे पोळा सणावर विरजण पडले होते. सध्याही सण, उत्सवांना परवानग्या नसल्याने यंदासुद्धा पोळा सण सार्वजनिकरित्या साजरा करता येईल की नाही, याबाबत शेतकऱ्यांमध्ये साशंकता आहे.

वर्षभर शेतीत राबणाऱ्या बैलांचा पोळ्याच्या दिवशी शेतकरी सन्मान करीत असतो. यंदा हा सण सोमवार (ता. सहा सप्टेंबर)ला आहे. ग्रामीण भागातील आठवडी बाजारांत बैलपोळ्यानिमित्त लागणारे सजावटीचे साहित्य विक्रीसाठी उपलब्ध झालेले आहे. 

पोळ्याच्या आदल्या दिवशी शेतकरी बैलांना आवतन (निमंत्रण) देत असतात. खांदे मळणी केली जाते. पोळ्याच्या दिवशी बैलांना स्नान घालून रंगरंगोटी केली जाते. झुला चढविल्या जातात. गावच्या वेशीवर गावातील सर्व बैल एकत्र होऊन पोळा भरवण्याची परंपरा आजही टिकून आहे. परवानगी मिळाली तर सार्वजनिक पोळ्यात सहभाग अन्यथा घरीच बैलांची पूजा, ओवाळणीची तयारी सुरू झाली आहे.

बैलपोळ्याचा सण सार्वजनिक पद्धतीने साजरा करायचा किंवा नाही याबाबत ग्रामपंचायतीकडून शेतकऱ्यांना अद्याप कुठलीही माहिती देण्यात आलेली नाही. - कैलास नागरे, शेतकरी, शिवणी आरमाळ, जि. बुलडाणा