फळबागांची हॉर्टिनेटद्वारे करा नोंदणी कृषी विभागाचे आवाहन

सोलापूर ः कीटकनाशक उर्वरित अंश व कीड-रोगांची हमी देण्याकरिता हॉर्टिनेटद्वारे निर्यातक्षम बागांची नोंदणी करण्यात येते, यंदाही निर्यातक्षम फळे व भाजीपाला पिकांच्या निर्यातीकरिता युरोपियन युनियन व इतर देशांना निर्यातीसाठी नोंदणी बंधनकारक आहे. त्यासाठी नोंदणी करावी, असे आवाहन जिल्हा अधीक्षक कृषी अधिकारी बाळासाहेब शिंदे यांनी केले आहे. गेल्यावर्षी २०२०-२१ मध्ये सोलापूर जिल्ह्यातून १४८६ हेक्टर क्षेत्रावर २०४९ फळबाग व भाजीपाला प्लॉटची नोंदणी झाली. यंदा २०२१-२२ साठी ही नोंदणी सुरु करण्यात आली आहे. जिल्ह्यातील निर्यातक्षम फळे व भाजीपाला उत्पादन करणाऱ्या निर्यातदार शेतकऱ्यांनी नोंदणी किंवा नूतनीकरणाकरिता कृषी विभागाच्या कृषी सहायक, कृषी पर्यवेक्षक, मंडळ कृषी अधिकारी व तालुका कृषी अधिकारी यांच्याकडे संपर्क साधून त्वरित विहित नमुन्यातील अर्ज, ७/१२ उतारा, ८ अ उतारा, बागेचा नकाशा, व आवश्यक नोंदणी फीसह अर्ज करावेत व आपल्या प्लॉटची नोंदणी करावी, असेही श्री. शिंदे यांनी सांगितले. नोंदणीची मुदत, शुल्क या प्रमाणे ग्रेपनेट, पीक- द्राक्ष,-ऑक्टोबर २०२१ ते नोव्हेंबर २०२१ -५०/-रुपये प्रति १.५० हेक्टर क्षेत्राकरीता / द्राक्ष लेट फी- नोव्हेंबर २०२१ ते डिसेंबर २०२१-१००/- रु प्रति १.२० हेक्टर क्षेत्राकरिता. मँगोनेट- आंबा- डिसेंबर २०२१ ते जानेवारी २०२२- फी आवश्यकता नाही. अनारनेट-डाळिंब-ऑक्टोबर २०२१ ते जानेवारी २०२२- फी आवश्यकता नाही. व्हेजनेट-भाजीपाला-वर्षभर सुरू परंतु काढणीच्या अगोदर १५ दिवस आवश्यक – फी आवश्यकता नाही. सिट्रसनेट-लिंबुवर्गीय-वर्षभर सुरू, परंतु काढणीच्या अगोदर १५ दिवस आवश्यक- फी आवश्यकता नाही.