सुधारित लागवड तंत्रज्ञान वापरा ः प्रा. भालेराव

पोतरा, जि. हिंगोली ः सोयाबीनच्या उत्पादनवाढीसाठी सुधारित लागवड तंत्रज्ञानाचा अवलंब करावा. कीड, रोगाचे वेळेवर नियंत्रण करणे आवश्यक आहे, असे प्रतिपादन तोंडापूर येथील कृषी विज्ञान केंद्रातील प्रा. राजेश भालेराव यांनी केले.

अॅग्रोवनतर्फे महाधनच्या सहकार्याने पोतरा (ता. कळमनुरी) येथे खरीप नियोजन या विषयावर आयोजित अॅग्रोवन संवाद चर्चासत्रामध्ये प्रा. भालेराव बोलत होते. या वेळी महाधनचे अतुल अनभुले, अध्यक्ष किशोर मूलगीर, माजी सरपंच संभाजी मुलगीर, राधाकिशन मुलगीर, मेजर बाबुराव रणवीर, ग्यानबाराव रणवीर, दत्तराव मुलगीर, राजू पाटील, देवानंद मुलगीर, कुंडलिक रणवीर आदी उपस्थित होते. प्रा. भालेराव पुढे म्हणाले, की एप्रिल-मे महिन्यात खोल नांगरट करून सोयाबीन पेरणीसाठी जमीन तयार करावी.

सोयाबीनच्या सुधारित वाणांची निवड करावी. पेरणीपूर्वी जिवाणू संवर्धके, तसेच बुरशीनाशकांची बीजप्रक्रिया करावी. कीड रोगाचे वेळेवर व्यवस्थापन करावे. आंतरमशागतीद्वारे तणनियंत्रण करावे. श्री. अनभुले यांनी महाधनच्या विविध खतांची माहिती दिली. अग्रोवनचे वितरण प्रतिनिधी संतोष जवळे यांनी सूत्रसंचालन केले. सकाळचे बातमीदार रघुनाथ मुलगीर यांनी आभार मानले.