Drought 2019 : हतबलतेतून फळबागांवर कुऱ्हाड अन्‌ पाण्यासाठी वणवण

<p>जालना : जीवापाड जपलेली बाग वाचविण्यासाठी रानोमाळ टॅंकर घेऊन फिरणारे शेतकरी, प्रयत्नांची पराकाष्ठा करूनही यश न आल्याने सरपण झालेल्या फळबागेवर चालविलेली कुऱ्हाड, अपवाद वगळता पाण्यासाठी आसुसलेले शेततळे, कर्जमाफी, कर्ज न मिळणे, विमा परताव्याचे भिजत घोंगडे व त्यातील घोळ, बाग वाचविण्यासाठी जवळची जमापुंजी खर्च करावी की खरिपाची सोय लावावी या चिंतेने दुष्काळग्रस्त जालना जिल्ह्यातील शेतकऱ्यांची झोप उडाल्याचे चित्र आहे. यंदाच्या दुष्काळात होरपळणारे जालना जिल्ह्यातील शेतकरी या आधीच्या दुष्काळात असं नव्हतं म्हणताना दिसतात. गतवर्षी जालना जिल्ह्यात सरासरीच्या तुलनेत ६१ टक्‍केच पाऊस झाला. चार तालुक्‍यांत पावसाचा टक्‍का ६० च्या आत राहिला. बहुतांश भागात पंचमीनंतर पावसाने मारलेली दांडी, त्यामुळे हातचा गेलेला खरीप, रब्बीला बसलेला फटका, त्यामुळे धान्य आणि पाणी विकत घेण्याची आलेली वेळ, जनावरांचा चारा व पाण्याचा निर्माण झालेला प्रश्न, मे महिन्याच्या मध्यानंतर काही तोकड्या प्रमाणात सुरू झालेल्या चारा छावण्या, हाताला काम नसल्याने रोजगाराचा निर्माण झालेला प्रश्न, त्यामुळे वाढत असलेले स्थलांतर साऱ्याच आघाड्यावर जालना जिल्ह्यातील शेतकरी, ग्रामस्थांची परीक्षा सुरू आहे. खरीप, रब्बीची पीक गेली पण विमा परतावा नाही, ज्यांना फळबागांचा विमा मिळाला त्यांचा त्यापेक्षा कित्येक पट खर्च पाण्याच्या शोधात होतो आहे. त्यामुळे मिळालेले पैसे बागा जगविण्यात घालावे की खरिपाची सोय कशी लावावी, तेथून पुढे पीक येईपर्यंत कुटुंबाचा चरितार्थ भागवावा कसा हा प्रश्न येथील शेतकरी कुटुंबांना भेडसावतो आहे. (video : Santosh Munde)</p>