Summer Heat Update : उन्हाच्या झळांनी अंगाची लाही

Weather Update Pune : राज्याच्या कमाल तापमानात चांगलीच वाढ झाली आहे. उन्हाच्या झळांनी अंगाची लाही-लाही होत आहे. विदर्भासह मराठवाडा आणि मध्य महाराष्ट्रातही उन्हाचा चटका तापदायक ठरत आहे.

पावसाला पोषक हवामान झाल्याने आज (ता. २३) विदर्भात वादळी पावसाची शक्यता आहे. तर मराठवाडा आणि उत्तर महाराष्ट्रात तुरळक ठिकाणी विजांसह पावसाचा अंदाज हवामान विभागाने वर्तविला आहे.

सोमवारी (ता. २२) सकाळपर्यंतच्या २४ तासांमध्ये विदर्भातील अकोला आणि मराठवाड्यातील परभणी येथे राज्यातील उच्चांकी ४४ तापमानाची नोंद झाली. मध्य महाराष्ट्रातही कमाल तापमान ४३ अंशांच्या पुढे गेले आहे.

कोकण वगळता उर्वरित राज्यात बहुतांश ठिकाणी तापमान ३७ ते ४३ अंशांच्या दरम्यान आहे. विदर्भासह मराठवाडा, मध्य महाराष्ट्रात उन्हाच्या झळा वाढल्या असून, कोकणासह राज्यात उष्ण व दमट हवामानामुळे घामाच्या धारा वाहत आहेत.

पूर्व उत्तर प्रदेश आणि परिसरावर, तेसच दक्षिण तामिळनाडू आणि परिसरावर समुद्र सपाटीपासून १.५ किलोमीटर उंचीवर चक्राकार वाऱ्यांच्या स्थिती आहेत.

विदर्भापासून तेलंगणा, रायलसीमा ते दक्षिण तामिळनाडू पर्यंत समुद्रसपाटीपासून ९०० मीटर उंचीवर हवेचा कमी दाबाचा पट्टा सक्रिय आहे. आज (ता. २३) उष्ण व दमट हवामानामुळे राज्यात चटका आणि उकाडा त्रासदायक ठरणार आहे.

विदर्भात ताशी ३० ते ४० किलोमीटर वेगाने वारे वाहून वादळी पावसाची, उत्तर महाराष्ट्र, मराठवाड्यात तुरळक ठिकाणी विजांसह पावसाची शक्यता आहे. उर्वरित राज्यात उन्हाचा चटका कायम राहण्याचा अंदाज वर्तविण्यात आला आहे.

सोमवारी (ता. २२) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३८.८ (२२.३), जळगाव ४३.० (२७.२), धुळे ४२.० (-), कोल्हापूर ३७.१ (२४.५), महाबळेश्वर ३२.९ (२०.७), नाशिक ३७.५ (२२.३),

निफाड ३९.८ (२४.२), सांगली ३९.७ (२४.६), सातारा ३९.८ (२४.०), सोलापूर ४३.५ (२८.५), सांताक्रूझ ३३.४ (२७.०), डहाणू ३३.५ (२७.५), रत्नागिरी ३४.४ (२६.६),

छत्रपती संभाजीनगर ४१.१(२३.९), नांदेड ४२.२ (२६.२), परभणी ४४.० (२६.९), अकोला ४४.० (२६.२), अमरावती ४२.०(२४.५), बुलढाणा ४१.० (२७.५), ब्रह्मपूरी ४३.१ (२६.४),

चंद्रपूर ४३.०(२८.४), गोंदिया ४३.२ (२६.८), नागपूर ४३.२ (२७.६), वर्धा ४३.५(२८.५), वाशीम ४२.४(२७.०) यवतमाळ ४२.० (२४.२).

मॉन्सूनची प्रगती नाही

नैर्ऋत्य मोसमी वारे (मॉन्सून) शुक्रवारी (ता. १९) दक्षिण बंगालचा उपसागर, दक्षिण अंदमान समुद्र आणि निकोबार बेटांवर मॉन्सून दाखल झाले. सोमवारी (ता. २१) मॉन्सूनची वाटचालीत कोणतीही प्रगती झाली नाही.

मॉन्सूनच्या वाटचालीस पोषक हवामान असल्याने दोन दिवसात दक्षिण बंगालच्या उपसागर, अंदमान समुद्र आणि अंदमान बेटांच्या आणखी काही भागात मॉन्सूनची प्रगती होण्याची शक्यता आहे.

विदर्भ : बुलढाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.