Cyclone Mocha : ‘मोचा’ चक्रीवादळ आज धडकण्याची शक्यता

Weather Update Pune : : बंगालच्या उपसागरातील अतितीव्र ‘मोचा’ चक्रीवादळ बांगलादेश आणि म्यानमारकडे झेपावत आहे. आज (ता. १४) दुपारपर्यंत हे अतितीव्र चक्रीवादळ दक्षिण बांगलादेश आणि उत्तर म्यानमारच्या किनाऱ्यावर असलेल्या सिटवेजवळ किनाऱ्याला धडकण्याचा इशारा देण्यात आला आहे.

पूर्व किनारपट्टीपासून दूर जात असलेल्या चक्रीवादळाचा महाराष्ट्रावर प्रभाव जाणवणार नाही. ‘मोचा’ चक्रीवादळ शनिवारी (ता.१३) ही प्रणाली पोर्ट ब्लेअरपासून ५६० किलोमीटर वायव्येकडे, बांगलादेशाच्या कॉक्सबाजार पासून ६३० किलोमीटर दक्षिणेकडे, म्यानमारच्या सिट्वेपासून ५५० किलोमीटर नैर्ऋत्येकडे होती.

अतितीव्र चक्रीवादळ आज (ता. १४) दुपारपर्यंत बांगलादेशाच्या कॉक्स बाजार आणि म्यानमारच्या 'क्याउक्प्यू' दरम्यान सिटवे जवळ किनारपट्टीला धडकण्याची शक्यता आहे. चक्रीवादळ किनारपट्टीलगत येताच या भागात प्रभावामुळे ताशी १७० ते २०० किलोमीटर वेगाने वारे वाहण्याची शक्यता आहे.

ईशान्य भारतात मुसळधार पावसाची शक्यता

‘मोचा’ चक्रीवादळाच्या प्रभावामुळे बंगालच्या उपसागरात ढगांची दाटी झाली आहे. चक्रीवादळाच्या प्रभावामुळे ईशान्य भारतातील त्रिपुरा, मिझोराम, नागालँड, मणिपूर, पूर्व अरुणाचल प्रदेश व दक्षिण आसाम राज्यात जोरदार वाऱ्यासह मुसळधार पावसाची शक्यता आहे. तसेच समुद्र खवळून उंच लाटा उसळणार असल्याने मासेमारीसाठी समुद्रात न जाण्याचा इशारा देण्यात आला आहे.