Heat Wave Maharashtra : राज्यात उष्णतेची लाट

Weather Update Pune : राज्यात उन्हाची ताप वाढल्याने चटका तापदायक ठरत आहे. राज्यात कमाल तापमानाचा पारा हंगामातील उच्चांकी पातळीवर पोचला आहे. उन्हाच्या झळांनी पिके, ऊस, फळबागा करपू लागल्या आहेत.

उकाड्यातही वाढ झाल्याने अंगाची लाही लाही होत असून उष्माघातामुळे जिवीतहानी वाढण्याचे शक्यता आहे. आज (ता. १४) राज्यात उन्हाची ताप टिकून राहणार असून, विदर्भात उष्ण लाटेचा इशारा हवामान विभागाने दिला आहे.

मार्च आणि एप्रिल महिन्यात वादळी पावसाने तडाखा दिल्यानंतर मे महिन्यात उन्हाच्या झळा वाढू लागल्या आहे. चटका वाढल्याने बाष्पीभवनाचा वेग वाढून, जमिनीतील ओलावा कमी होत उन्हाळी पिकांना पाण्याचा ताण बसू लागला आहे.

पिकांची पाण्याची मागणी वाढणार आहे. पिकांची पाने करपू लागली असून, केळी, संत्रा, मोसंबी सह फळांनाही चटका बसत आहे. उन्हाच्या झळामुळे माणसांसह, जनावरे व कोंबड्यांनाही उष्माघाताचा त्रास जाणवू लागला आहे.

शनिवारी (ता. १३) सकाळपर्यंतच्या २४ तासांमध्ये उत्तर महाराष्ट्रातील जळगाव येथे राज्याचे यंदाच्या हंगामातील उच्चांकी ४४.८ अंश सेल्सिअस तापमान नोंदले गेले. अकोला येथेही पारा ४४ अंशाच्या पुढे गेला असून, धुळे, परभणी वर्धा येथे तापमान ४३ अंशांपेक्षा अधिक असल्याचे दिसून आले. राज्यात बहुतांश ठिकाणी तापमान चाळीशीपार गेले आहे.

गुजरात आणि परिसरावर असलेली चक्राकार वाऱ्यांची स्थिती निवळून गेली आहे. नैर्ऋत्य राजस्थान आणि पूर्व उत्तर प्रदेशात दोन ठिकाणी चक्राकार वाऱ्यांच्या स्थिती आहेत. आज (ता. १४) राज्यात कमाल तापमानातील वाढ कायम राहण्याबरोबरच, दमट आणि उष्ण हवामान अधिक त्रासदायक ठरण्याची शक्यता हवामान विभागाने वर्तविली आहे.

शनिवारी (ता. १३) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ४०.८ (२५.१), जळगाव ४४.९ (२७.३), धुळे ४३.० (२४.५), कोल्हापूर ३५.६ (२४.६), महाबळेश्वर ३३.६ (२०.४), नाशिक ३९.७ (२४.०),

निफाड ४२.१ (२३.०), सांगली ३८.१ (२४.२), सातारा ४०.४ (२३.४), सोलापूर ४१.४ (२५.५), सांताक्रूझ ३५.० (२७.०), डहाणू ३६.७ (२७.०), रत्नागिरी ३५.० (२७.०),

छत्रपती संभाजीनगर ४१.४ (२४.०), नांदेड ४२.८ (२४.०), परभणी ४३.६ (२६.६), अकोला ४४.५ (२३.२), अमरावती ४२.६(२१.३), बुलढाणा ४०.६ (२७.६), ब्रह्मपूरी ४१.२ (२२.९),

चंद्रपूर ४१.६(२२.०), गडचिरोली ४०.०(२३.०), गोंदिया ४२.५ (२१.२), नागपूर ४२.० (२१.८), वर्धा ४३.४(२२.८), यवतमाळ ४२.० (२२.०).