Ratnagiri News : चिपळूण तालुक्यातील अलोरे भागात गुरुवारी (ता. १३) दुपारी जोरदार वाऱ्यांसह वादळी पाऊस पडला. त्यामुळे परिसरातील नागरिकांची चांगलीच धावपळ उडाली. या पावसामुळे परिसरातील वीजपुरवठा खंडित करण्यात आला.
आलोरेसह पोफळी, कुंभार्ली, शिरगाव, नागावे पेढंबे, कोळकेवाडी परिसरात वादळी पाऊस झाला. चार दिवसांपूर्वीही या परिसरात पाऊस पडला होता.
त्यामुळे आंबा-काजूचे मोठे नुकसान झाले. गुरुवारी पुन्हा झालेल्या पावसाने या भागातील बागायतदारांना मोठा फटका बसला आहे. अलोरे परिसरात सकाळपासून उकाडा जाणवत होता.
दुपारी अडीचनंतर जोरदार वारे सुरू झाले. त्यामुळे खबरदारी म्हणून महावितरणकडून वीजपुरवठा खंडित करण्यात आला. दुपारी चारच्या सुमारास पावसाच्या हलक्या सरी सुरू झाल्या. पाठोपाठ गाराही पडल्या.
त्या गोळा करण्यासाठी ग्रामस्थ घराबाहेर पडले. पण पावसाचा जोर वाढल्याने त्यांची तारांबळ उडाली. पंधरा ते वीस मिनिटे पाऊस झाला.
पाऊस थांबल्यानंतरही वीजपुरवठा सायंकाळी उशिरापर्यंत सुरळीत झाला नव्हता. या पावसामुळे मात्र हवेत गारवा निर्माण झाला.
संगमेश्वर तालुक्यातही सायंकाळी काही काळ विजांचा कडकडाट झाला. त्या प्रमाणात पाऊस पडला नाही. पण खंडित झालेला वीजपुरवठा रात्रीपर्यंत सुरू झाला नव्हता.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
