Rain Forecast : राज्यात पुन्हा वादळी पावसाचा इशारा कायम

Pune Weather Update : राज्याच्या विविध भागात वादळी पाऊस (Stormy Rain), गारपिटीने (Hailstorm) हजेरी लावली आहे. कमाल तापमानात काहीशी घट होऊन उकाड्यात वाढ झाली आहे.

आज (ता.९) मध्य महाराष्ट्र, मराठवाडा आणि विदर्भात वादळी वाऱ्यासह पावसाचा (Rain Forecast) इशारा हवामान विभागाने दिला आहे. कमाल तापमानात घट होणार असली तरी उन्हाचा चटका आणि उकाडा कायम राहण्याची शक्यता आहे.

ढगाळ हवामान, पावसाची हजेरी यामुळे राज्यातील कमाल आणि किमान तापमानात चढ-उतार होत आहेत. शनिवारी (ता. ८) सकाळपर्यंतच्या २४ तासांमध्ये ब्रह्मपुरी येथे राज्यातील उच्चांकी ३९.२ अंश सेल्सिअस तापमानाची नोंद झाली.

तर जळगाव आणि धुळे येथे तापमान ३९ अंशावर पोचले होते. उर्वरित राज्यात बहुतांश ठिकाणी कमाल तापमान ३४ ते ३९ अंशांच्या दरम्यान होते. तर किमान तापमानाचा पारा वाढून १६ ते २५ अंशांच्या दरम्यान होते.

दक्षिण राजस्थान आणि परिसरावर समुद्र सपाटीपासून ५.८ किलोमीटर उंचीपर्यंत चक्राकार वाऱ्यांची स्थिती, मध्य महाराष्ट्र ते केरळपर्यंत समुद्र सपाटीपासून १.५ किलोमीटर उंचीवर हवेचा कमी दाबाचा पट्टा सक्रिय असल्याने राज्यात पावसाला पोषक हवामान आहे.

शनिवारी (ता. ८) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३६.० (२१.१), जळगाव ३९.० (२१.२), धुळे ३९.० (१७.६), कोल्हापूर ३८.१ (२२.३), महाबळेश्वर २९.० (१६.८), नाशिक ३५.८ (२०.६),

निफाड ३६.६(१८.५), सांगली ३३.७ (२१.५), सातारा ३५.४ (२०.५), सोलापूर ३१.६ (२१.५), सांताक्रूझ ३५.५ (२०.०), डहाणू ३२.८ (२५.५), रत्नागिरी ३४.४ (२४.४),

छत्रपती संभाजीनगर ३५.८ (१८.८), नांदेड ३३.२ (२२.४), परभणी ३७.८ (२२.२), अकोला ३७.३ (१८.६), अमरावती ३७.०(१७.१), बुलडाणा ३५.४ (१९.०), ब्रह्मपुरी ३९.२ (२२.२),

चंद्रपूर ३४.० (२२.४), गडचिरोली ३४.४(१७.४), गोंदिया ३८.४ (२०.४), नागपूर ३७.० (१९.६), वर्धा ३८.०(१९.८), वाशीम ३६.२ (१९.८), यवतमाळ ३७.२ (१९.२).

वादळी पावसाचा इशारा (येलो अलर्ट) :

मध्य महाराष्ट्र : नगर, पुणे, सातारा, सांगली, सोलापूर, कोल्हापूर.

मराठवाडा : छत्रपती संभाजीनगर, जालना, बीड, धाराशिव.

विदर्भ : बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.