नगर ः महात्मा फुले कृषी विद्यापीठातील बीजोत्पादन (Seed Production) प्रकल्पाला देशात प्रथम क्रमांक मिळाला आहे. भारतीय बियाणे विज्ञान संस्था (मऊ, उत्तर प्रदेश) येथे झालेल्या वार्षिक बीजोत्पादन आढावा बैठकीत हा बहुमान देण्यात आला आहे.
नवी दिल्लीतील भारतीय कृषी संशोधन परिषदेचे (ICAR) बियाणे विभागाचे सहायक निदेशक डॉ. डी. के. यादव, भारतीय बियाणे संशोधन संस्थेचे संचालक डॉ. संजयकुमार व केंद्र सरकारच्या बियाणे विभागाचे सचिव आश्विनकुमार या वेळी उपस्थित होते.
महाराष्ट्रातील दहा जिल्ह्यांत विस्तार असलेला आणि राज्यातील सर्वात मोठे कृषी विद्यापीठ म्हणून ओळख असलेल्या महात्मा फुले कृषी विद्यापीठाचा वेगवेगळ्या उपक्रमात गौरव झाला आहे. देशभरातील ६५ बीजोत्पादन प्रकल्पांतून महात्मा फुले कृषी विद्यापीठाच्या प्रकल्पास प्रथम क्रमांक मिळाला. या प्रकल्पाद्वारे तयार होणारे फुले बियाणे देशातील शेतकरी व बीजोत्पादन कंपन्यांच्या पसंतीस उतरले आहे. कांदा फुले समर्थ बियाण्यास महाराष्ट्रातून मोठी मागणी असते. विद्यापीठाने विकसित केलेल्या सोयाबीन पिकाच्या, फुले संगम व फुले किमया या वाणांच्या बियाण्यांसाठी शेतकरी पहिली पसंती देतात. विद्यापीठात २७ पिकांच्या वाणांचे मूलभूत व पायाभूत बीजोत्पादन करून, हे बियाणे महाराष्ट्र राज्य बियाणे महामंडळ, नॅशनल सीड कॉर्पोरेशन व बियाणे उत्पादक कंपन्या तसेच शेतकरी गटांना उपलब्ध करून दिले जाते. विद्यापीठातील बीजोत्पादन कार्यक्रम विद्यापीठाच्या प्रक्षेत्रावर व दहा जिल्ह्यांतील प्रक्षेत्रांवर राबविला जातो.
कुलगुरू डॉ. प्रशांतकुमार पाटील, संशोधन संचालक डॉ. शरद गडाख यांच्या मार्गदर्शनाखाली बियाणे विभागाने हे यश मिळवले आहे. डॉ. आनंद सोळंके, डॉ. चंद्रकांत साळुंखे, डॉ. कैलास गागरे यांच्यासह विभागातील अधिकारी, कर्मचाऱ्यांचे कौतुक केले आहे. विद्यापीठाने संशोधित केलेल्या विविध सुधारित वाणांच्या बियाण्यांची येथून विक्री केली जाते. त्याला मागणीही चांगली आहे. सुधारित वाणांमुळे उत्पादन वाढ होण्याला मदत झाली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.