Barsu Refinery : बारसू रिफायनरीसाठीचे माती परीक्षण पूर्ण : उदय सामंत

Uday Samant News : ‘‘बारसू (ता. राजापूर) रिफायनरीसाठी सुरू असलेले माती परीक्षण पूर्ण झाले आहे. धूतपापेश्‍वर गावातील ग्रामस्थांनीही आता समर्थन दिले आहे. अन्य गावातील लोकांना विश्‍वासात घेऊनच हा प्रकल्प मार्गी लावला जाईल,’’ असे उद्योगमंत्री उदय सामंत यांनी सांगितले.

रत्नागिरीत पत्रकारांशी संवाद साधताना सामंत म्हणाले, ‘‘बारसू परिसरातील गावांमध्ये माती परीक्षणासाठी बोअर खोदण्याचे काम आता पूर्ण होत आले आहे. जवळपास ७५ बोअर खणण्यात आल्या आहेत.

पोलिस यंत्रणा, महसूल प्रशासन या ठिकाणी ग्रामस्थांना विश्‍वासात घेण्यासाठी सातत्याने संपर्क ठेवून आहे. आतापर्यंत जिल्हा प्रशासनाने सात ते आठ बैठका येथील ग्रामस्थांसोबत आयोजित केल्या होत्या.

बारसू परिसरातील अगदी मोजकेच ग्रामस्थ विरोध करण्यात होते. मात्र आजूबाजूच्या गावांतील ग्रामस्थांची संख्या अधिक होती, अशी माहिती प्रशासनाकडून उपलब्ध झाली आहे.’’

‘‘राष्ट्रवादीचे अध्यक्ष शरद पवार यांनीही ग्रामस्थांना विश्‍वासात घेऊन हा प्रकल्प करण्याचा सल्ला दिला आहे. त्यांनीही रिफायनरीच्या सुरक्षिततेची माहिती घेतली आहे. प्रशासनासोबतही त्यांनी संपर्क केला असून, येथील परिस्थिती जाणून घेतली आहे,’’ असे सामंत म्हणाले.

'ग्रामस्थांच्या मागण्यांचा होणार योग्य विचार’

‘‘धूतपापेश्‍वर गावातील ग्रामस्थांनीही आता या प्रकल्पाला समर्थन दिले आहे. मात्र काही मागण्या प्रशासनासमोर ठेवल्या आहेत. त्यांच्या मागण्यांचा योग्य विचार केला जाईल,’’ असे आश्‍वासन सामंत यांनी दिले.