Team Agrowon
इथेनॉल निर्मितीसाठीचा साखर उद्योगावरील ताण कमी करण्याचा भाग म्हणून केंद्राच्या वतीने मक्यापासून इथेनॉल निर्मितीला प्रोत्साहन देण्यात येणार आहे.
मक्याचे उत्पादन वाढवण्यासाठी मोठ्या प्रमाणात प्रयत्न करण्यात येणार आहेत.
देशभरातील मका संशोधन केंद्राशी संपर्क साधून मक्याचे उत्पन्न वाढवण्यासाठी उपाययोजना करण्यात येणार असल्याची माहिती अन्न व सार्वजनिक वितरण विभागाच्या सूत्रांनी दिली.
२० टक्के इथेनॉल मिश्रणाचे लक्ष्य साध्य करण्यासाठी १००० कोटी लिटर इथेनॉलची गरज आहे. तर अन्य उपयोगासाठी ३७६ कोटी लिटरची गरज आहे.
ठरावीक मर्यादेच्या पलीकडे ऊस क्षेत्र वाढू शकत नाही. यामुळे धान्याचे उत्पादन वाढवण्याची गरज आहे. यामुळे येथून पुढे लक्ष्यांक गाठण्यासाठी मका सारख्या पिकांचे उत्पादन वाढविण्याच्या प्रयत्नात सरकार आहे.
सध्या देशात ३४० लाख टन मक्याचे उत्पादन होते. पुरेशा प्रमाणात इथेनॉलनिर्मिती होण्यासाठी ४२० लाख टन मक्याच्या उत्पादनाची गरज आहे.
मक्यावर काम करणाऱ्या संशोधन केद्रांशी समन्वय साधून देशात कोणत्या ठिकाणी मक्याच्या लागवडीला किती प्रमाणात वाव आहे याविषयी चर्चा करण्यात येईल.
मक्याच्या उत्पादनापैकी ४० टक्के मका पोल्ट्री खाद्यासाठी वापरला जातो. १३ टक्के चाऱ्यासाठी वापरला जातो. १२ टक्के औद्योगिक वापरासाठी वापरला जातो.